Caadleef (HJ)

Abwaan Caadleef, Eebbe ha u naxariistee, wuxuu gabaygan tirshey 1953 kii mar duul Qurjiile ahi ay geel aad u badan ka qaadeen deegaanka Eexo ee degmada Garadag, Sanaag. Duulkii geelaas qaaday waxa lagu gaadhay Xargaga oo Laascaanood dusheeda ah halkaasoo lagu dilay 33 nin geeliina badhkiis dib baa loo soo taabay.  Wuxuu abwaanku ka cadhooday geelii oo badhkiisii kale ay niman la jiciirteen intii lagu dagaallamayey. Wuxuu Caadleef oo aan guushaa dhantaalan ku qancini lee yahay inkastoo raggii geela hungureeyey la galaaftay misna libintii weli waa hayaan mar haddii geel summad Habar Jeclo leh ay xeryahooda ku jiraan. Xargaga waxa mar danbe oo isla waqtigaas ah ka dhici doona dagaal weynihii "Xargaga" ee uu kiiskii Qaraweyne ka ratibmay isla arrintan geelana ku saabsanaa. Gabaygu ma dhamma;

 

Rogaalkii Xargaga waa sidii Ruuga oo kale'e

Guutada sidii Rayfalkii la isku raad gooyey

Markii raasammaal iyo horweyn laysku wada riixay

 

Markay raaboraabaha ahayd siday naq raacayso

Sidii reero geeddiya markay wada rukeyneysey

Ramagramagta goortay candhada ruugga marinaysey

 

Reytoow Markuu baarqabkii ridayey baaruudda

Rasaasta iyo qaylada markuu gadayey reenkeedu

Nin raxaabadkeedii ogaa nabad ma raadsheene

 

Ragannimo hadday geeri tahay adhi ma raacdeene

Ma raanraanbiyeen xoolahaa reedhi loo yahaye

Inkastoo raggoodii ku lumay raacday libintiiye

 

Raaxada nugaaleed ninkii rabayba loo diidye

Toljecluu ramaaskiyo ka badan roobkan Xays helaye

Miyeydnaan rogeyn ceebta waa la iska reebaaye

 Weerar lixaad leh ayaa cuskaday nimankii geela qaaday waxana laga taabay 10 kun oo halaad markaasuu abwaanku gabay kale u noqday (Halkan Riix)