| |
Gabaygan wuxuu
ka mid ahaa gabayadii 1983kii uu Xalleef ka tiriyey Dagaalkii Haye ee
Dhulmahante iyo ciidamadii xukunkii faasidka ahaa ee Afweyne ay ku qaadeen
Habar Jeclo Galbeed. Wuxuu Xaleef si saadaalinayaa colaaddaasi inay ku
danbayn doonto baryootan Dhulmahante iyo in laga rari doono Woqooyiga
haddaanay toobad keenin taasoo dhacday 1991 kii.
Haddii uu dad wada yaal asuu, duunyo kala waayo
Qayb baa xumaatada waddoo, belo ku waartaaye
................. loo siman yahaa, wegenku soofaaye
Haddiise wegered laysugu lallabo, werisku caatoowye
Waxsaarka iyo hafriinyuhuba waa, waxan qarsoomayne
Wixii jiraba goobjoogyadaa, laga waraystaaye
Wacdi iyo waciid iyo sharciga, waa la aaminaye
Waxa maragga loogu cinbadaa, waadaxaa jidahe'e
Wanaagii qallooca u beddele, wiilashii bariye
Waddankoo ammaanay fidmada, walac ka oogeene
Wax la kala qaboojaba ma demin, wig iska siintiiye
Maantana wacdara qaatilaa madhiyey waabteere
Waayeelka Saaxdheer degiyo, wacane mooyaane
Wadaad talada lagu diiday iyo, weliyo mooyaane
Woqooyiga dhulmahantoow hadaad, waayo ku caweyso
Haddaan waaxidkaa caasideen, wacad idiin keenin
Haddii aan walluu idin makalin, weredka dhaarsiiska
Haddaydnaan warfaa Baynaxoow, wacad-furkaa eedin
Haddaan saxal wareegeysta iyo, Kawshax idin waalin
Haddaan cirirka soo waantiyaa, idinku soo weecan
Haddaan wahanka Naaf soommanaa, waaban degelkiinna
Haddaydnaan waraaq iyo sidii, waar ka fududaannin
Haddaan waranka aad looliseen, wiiqa idin goynin
Haddaan weerar xoogle iyo Gaas, wayrax idin boobin
Haddii aan widhiidhiga dabruhu, idinku weeedhaamin
.........................Sanaag, Walanqahaa ruugin
Haddaan wegedda Caymeed libaax, idin walaandeynin
Haddaan aar wisiisiyey ilkaha, idinku waaxyeynin
Haddii aan waraabaa togdheer, idinka waageeran
Hadddii aan waddiga goomman iyo, weere idin dhuuxin
Haddii aan waleecaad gorgora, warac idiin loogin
Haddaan waraqa Coomaadde lalay, idinku weesaaqin
Haddaan wabax dugaagiyo ku cunin, woofley iyo dhuuryo
Haddaan weer cad dumarkiinu xidhan, waajibka haweeenka
Haddaan weedhka duufaanka iyo, wiishku idin qaadin
Haddaan sida maxaabbiis la wado, la idin weetaynin
Haddaanad haadda geed weydayee, weehata ahaanin
Haddaydaan walaac iyo wahsiga, webin itaalkiinna
Haddaan welefsigii idinku noqon, sun iyo waabeeyo
Hadddaydaan harraadka u wadhminoo, wada dugaagoobin
Haddaa walax ka soo dhaansataan, waadiyada ceelka
Haddaan waytabaaqiinna iyo, weyddu kala saydhmin
Haddii aad waddada dheer martaan, waadhidaa hilinka
Warsangeli haddaan jiidahaa, magan gal weydiisan
Haddaydnaan waq-geriyaad kulayl, ugu wadeecoobin
Haddaydnaan warraaqii Taleex, waayihii mudannin
Haddaydnaan wadaadkii burburay, weheshan raadkiisa
Haddaan wegerdhac iyo diini, iyo waanbe idin gawdhin
Haddii aanu walaayadaha Xamar, Waqandhe kaa raafin
Haddii aan Wardhiigleey hawiye, idinku weyseysan
Werwer iyo haddaydnaan dhibiyo, wahan ku dheeraanin
Haddaydnaan wareer iyo qaxiyo, way ka bixi waayin
Haddii aan Walwaal iyo Wardheer, la idin weydaarin
Haddaydaan Wajeer iyo u kicin, webiga qoortiisa
Haddaydnaan Warrood iyo Aboow, Waaxidki u tuugin
Haddaydnaan wajaaliyo Berbera, weylaha u raacin
Haddaan waanadiyo daacaddii, idinla weynaanin
Haddaydnaan wayiga aad qubteen, waa danbe u baahan
Haddaydnaan walaal soo ergada, soo wacaal celinin
Haddaan werenweryadu noogu iman, hadh iyo Weylaalis
Haddaanaan dad kuma wiirsannee, wadarta sooryeynin
Haddaydaan waxaa ku hadashaan, weedha kari waayin
Haddaydnaan waqtifa fiirin iyo, waalifkii nabadda
Wixii shalayto idin soo maraa, wada illawdeene
Waydaan ahayn maalintaa, waxad is mooddeene
.......................baqaha wagac ka siisaane
Marka beladu idin soo waddana, ways cajabisaane
Weeysweyska dhiillada haddii, weriye soo qaysho
walbahaarka haddii uu habaas, wadhidu yeedheyso
Wadnihiinnu uma joogsan karo, waarta dhiidhidaye
Wax ka guro wedkiinnaa ku galay, waano sanaceede
|
|
