| |
Xalleef, Eebbe
ha u naxariistee, wuxuu gabaygan ka tirshey dagaalkii Dhulmahante lagu
wiiqay 1983-kii ee ka dhacay "Haye". Dagaalkan abwaanno aad u badan oo hayb
walba leh ayaa ka gabyey, tixdanna wuxuu abwaan Xalleef kaga warramayaa
badraddii (Adyadii) loola yimi Habar Jeclo iyo baqihii iyo baroortii lala
guryo noqday:
Basharyohow la
dagay geesahaad, bayr ku leedahaye
Buushbaa wadnaha kaaga jira, baydad goonniyahe
Waa waxa bahdii kaala baxay, beer kiraysaniye
Maxaad Baabullaha aar dharaar, ugu badheedhaysey
Niman beer libaax liqay maxaad, buud u maqashiisay
baruurtaada goosha ah maxaad, bahalaw siisay
boqnahaaga seedda ah maxaa, bir u dhaweynaayey
Maxaa bawdyihii kaa jebshey, iyo biixiyii dhabarka
Baqtigaaga wadhan Raydabdhuub, ba'e maxaa geeyey
Ma baraarugteen Baynaxoow, baadi baad tahaye
Ma ninkii bilaa guursadaa, bigil idiin qaaday
Ma Baan baa laguu furay dorraad, booligii qaranka
Badarkiyo Galleydii miyaa, idinla buurraaday
Diintii miyaa uga baxdeen, baahidii sebenka
Ballankii miyaa oofiseen, Baadariga Roma
Ma billaahidii baad gubteen, baalashi Quraanka
Badrad iyo ba'naan iyo baqdini, maydin baabi'isay
Ma burburay barbaar iyo raggaad, biiriseen dhimaye
Bilcilkii Haye ee Aadan Carab, baqa ku dheeraaday
Balli-Lebile, Heegalahay, beden ku foofaysey
Bogga laba-Fariid-yare waddada, baasha kaga taalla
Banka Qudhac-Dhallaan iyo halkiyo, Buruci Goosaalle
Illaa Boodda dheeriyo Marqaan, Bowdka Lebi-weyne
Baalidhaye Illaa Toommo iyo, barasankii hawdka
Bogga Goray jidbaaliyo badweyn, laanta bacaroorta
Bohol iyo Kulaaliyo xadeed, ilaha Beerweyso
Baalweyne iyo Daarseyiyo, taniyo Booc-Yeyle
Bashka Ceelafweyn iyo dhulkii, belelku qiiqaayey
Bananka iyo aydaba markii, weerar lagu baadhay
Buuhoodle iyo laasku waa, baraq nuglaadeene
Beelaa Dhulmahantoo dhanbaa, laga baroortaaye
Habarwaa bayuurbaa ku taal, aan bogsi lahayne
Bootaan shirshoorii hadduu, bacadka jiifaaye
Burdihi Taleex waayadii, booge kuugu reebye
Maantana cirkuu kuula baxay, beretenkiisiiye
Shaydaan buraanlaynayaa, babaca kuu saarye
Batarkii Ibleys baad cayaar, bilicle mooddaye
Biya aad cabtaa kuu sanqadhay, badalli roorkiiye
Idinkiyo Bukaasaba cidlaad, dad uga baaqdeene
Bilaash baysu raacdeen addoon, bar isma dhaantaane
bakayle iyo Galaw baan rafiiq, baafiya lahayne
|
|
