|
Silsiladda "DEELLEEY" oo curatay dabayaaqadii 1979 waxay ka
hadlaysaa wacyigii iyo waayihii markaa jirey Dalka Somalia. Waxay ahayd
dareen xalaal ah oo abwaaniinta somalia markaa ugu caansanayd qaarkoodu
ay dareenkooda ku cabbirayeen cawaaqibxumada ku soo fool leh
dalka Hooyo ee hororrada gacanta u galay.
Ayagoo aan ka baqayn xadhigii iyo dilkii caadada u ahayd
dhiigyacabkii "Afweyne" ee markaa talada dalka boobay ayay abwaaniintu tiriyeen
maansadan Deelleey oo ku ku wajahnayd turxaanbixinta mushikiladda
qabyaaladeed ee uu taliskii macangagga ahaa ee "Afweyne"
horseedka ka ahaa. Waxay silsiladdu ahayd dareen wadaniyadeed oon ku salaysnayn eex
iyo qabiil eedays balse ka digaysay in haddii aan tabaha dibindaabyada ah
la beddelin Somali meel dheer laga dooni doono.
Suugaanta taxanaha ah waxa bilaabay abwaanka weyn ee Maxamed
Xaashi Dhamac oo ku magac dheer "Gaarriye". Gaariye oo ah suugaanyahan aqoon
yahan ah wuxu daaha ka rogey qabiilkii ay huursanayeen qudhun-ku-noolka Afweyne
iyo qawlaysatada uu ku qadhaabto ee qabiilka la shegata. Bulshada wuxu ruux
kastaaba kaga jiraa "role" uu haddii uu ka baaqdona wiiqa haddii Eebbe ku
beegana badbaado u noqota inta kale. "Gaarriye" oo ah abwaan muwaadin ah waxay
la noqon weydey inuu daawado in kooxyar oo boob
ku qabsaday maamulkii dalku ay dalka iyo dadkaba haadaan ka
tuuraan.
Maansada "Deelleey" oo ay ka qayb galeen in ku dhow 50 abwaan
waxay isu rogtay dagaal ka dhex abuurmay abwaannada dadka iyo
dalka u doodistiisa duubka u xidhay iyo koox dib-ka-naaxyo ah
oo difaacayey daaquudkii "Afweyne". Illeen meel bugta iyo far
baa is oge, waxa durbadiiba suugaanta dillaacday damaqday
duulalkii denbiilayaasha ahaa ee sida dufan-jecesha
hareeraha ka leefayey booliga qaranka. Kooxdaas oo magac
Daarood kula saftay daaquudkii "Afweyne" iyo
dibindaabyayntiisii waxa ka mid ahaa Singub, Yamyam, Cali
Cilmi Afyare, Idaajaa iyo kuwo kale oo maanta dadka Soomalida
ku haasaawiye qiiro waddani oo been ah laabtana aan ka jirin.
|
