Jaamac Axmed Jaamac "Gacmadheere" HJ, Reer Yoonis "Caasi"

Gabaygan wuxu Jaamac jawaab uga dhigay qof wax ka sheegay qabiilka uu abwaanku ka dhashay ee Muuse Abokor. Soomaalidu waxay ku maahmaahdaa "Haddii lagu sheegana waa lays sheelaa, haddii lagu sheelona waa la is sheegaa". Wuxu Jaamac gabayga ku sheegayaa deegaanka baaxadda leh ee Muuse Abokor iyo cududda tolkiis lagu ciseeyo.

Caad waa Daruur, amase waa, curasho roobaade
Carun waa Tigaad, amase waa, caana nabadeede
Cirir waa abaar, amase waa, col iyo aynfaade
Ceel waa Wiyeer, amase waa, Ceeri buuxsamaye
Caws waa guyaad, amase waa, cabasar Dayreede
Hadalna waa caddaan amase waa ha isku caatayne.

Berigay colaaddii jirtey, ee laysu cararaayey
Jeexyada cagaarka ah kolkii, Cayn la mari waayey
Cidda Reer Isaaq, iyo Hartiga, cawl dhex miranaayey
Casha keliya weli geelayaga, lama ceshiimayne
Cosob meel leh oo laga cabsaday, Caabudlaba daaqye
Caarshuhuna kama joojin karo cawska Seeraha'e.

Caado iyo Dannood baan ku furay, curadki Dayreede
Ceelkii Bullaale iyo u horay, Ciyow darkiisiiye
Ciiddii guduudnayd u hoyay, cuunki Xodayoode
Ceeriga Garoowe iyo ka soof, cidhifki Sayloode
Carrisyada Gundheere iyo u gudub, coonka dhagaxbuure

Muusaha Carrada buuxiyey, bay Culus ku daaqdaaye
Cidla kii qabtaan maalkayaga, cunin Waraabuuye
Daaroodku waa noo ceshaa, caymadkaw gala'e
Ninka summadda caanka ah arkaa, waa ka cararaaye

Sidii culimadii Reer Makaa, nala ciseeyaaye
Gob tolkaaya lama caasiyoon, ceebtu qabanayne
Xaggayaga codkaa aad na tidhi, waa ku caariyo'e
Ma Cammaadin baad tahay maxaad adigu noo cayday.