Jaamac Axmed Jaamac "Gacmadheere" (1922 -2004) HJ, Reer Yoonis "Safar"

Yuusuf Nuur Jaamac oo ay Gacmadheere Ilmaadeer ahaayeen ayaa damcay inuu Berbera markii ugu horreysay u safro. Gacmadheere oo magaalada iyo axwaasheeda uga warbixinaya ayaa gabaygan waanada ah u laqimay Yuusuf. Siddeed qodob oo waano ah ayaa gabaygu farayaa Yuusuf, wuxuuna ku bilaabay;



Safartay ee haddaad Yuusufow, raratay saabaanka
Salaama Alla yeelyoow haddaad, suunta mari soonto
Sanaag waa habheeba ee haddaad, Saaxil nabad gaadho

Marka hore salaan iyo Qaxwaa, lagugu sooryeyne
Marka xiga su'aal bay ku odhan, yaad la socotaaye
Habeenkaa Senteri Gaadhahoon, seexan baad noqonne

Muunida salaaddii hadii aad, adhiga soo saarto
Subaxdaa xadhkaaluhu hadduu, Soofka kula iibsho
Saami bay isaga leeyihiin, Saalax-Weetada'e

Iyagoo wax saaray ku odhan, waanu soconayne
Adigay sed kaa ridi intay, sicirka dhaafshaane
Waa wada sagsaagiin colee yay ku sirin duulku.

Haddaad aragto toban siibane. oo suuqa ku ag taagan
Waa saaruqiinta'ee. waxaad sidato meel geyso
Sayaxaadda dheerbaad ku tegi, geedka saarka lehe

Sidriguu Qaxwuhu kaa xidhaa, saakin haw noqonnin
Sigaaryacab ha noqon buuri bay, soor ka deyayeene
Subaglaha Kidaarka ah ha cunin, saanjadna ha quudan

Saanbuusayaal iyo Mucbeel, siifadle ha iibsan
Baashaha sagaalaha wataa, sababa xoolaaye
Adigaan waxbaba siisan baad, soobir noqotaaye
Saaciidaduu kaa baxshaa sinaba haw eegin.

Sacab baad ku maqal xaafadaha, saan la tumayaaye
Waa sahan magaalo oo qarraaf, laysku sugayaaye
Sino iyo Balwaa lagu hayaa, surin ka weydaaro.

Saaxiib carmali waa wixii, saacadda ahaaye
Mar hadday halkaa seexo tadhi, way ku saa’iliye
Sariir iyo dermay kugu hoddaa, yay ku saban taasi.

Sideedaa iska raw meesha, waw saymo jaariyahe
Waanada sokeeyuhu ku yidhi, sadar ha moogaannin
Sufihina ha noqon wiil yarbaa, hadalku seegaaye
Waxba yay safaad kaaga tegin, saaxi adigoo ah
Hadii kale sidaa doonto yeel seegtay marinkiiye.