Jaamac Axmed Jaamac "Gacmadheere" (1922 -2004) HJ, Reer Yoonis "Gu' Onkoday"  - 1960 kii

Gacmeedheere wuxuu gabaygan kaga warramayaa sidii looga guulaystay dibindaabyadii isticmaarkii reer Galbeedka iyo sida bedelkoodii ay taladii dalka maroorsadeen rag gibil madoow laakiin geestii kaleba gaalkii tegey ka shaabaha;

Cir godladey, daruur soo guddey, oo gabaxda deyn weydey
Geel-dooje, Geydhiyo qayood, gaadhcadde hillaacay
Gu' onkodey gufaaco iyo mayay, geliba jaad keenye

Anna waxan gabyaa waa markuu, rag isku guulaaye
Golahaan ka sare joogsadaa, gelin-dhexaadkiiye
Kama Gaaf-wareego'e runtaan, ugu guddoonshaaye.

Afartaa darbaa guud mara, ee gaw ma kada siiyey
Ceel aan go'ayn iyo badweyn, gacan ma soo jeexay
Kii iga geddoomaba mid kale, gaatan ma u reebay

Gaawaha karuurkaan ku shubay, ma idin gaadhsiiyey
Gucumaale Aar iyo sidii, Galaw-ga maw yeedhay
Guuraha habeenkii ninkii, gudaya maw baaqay
Sidii neef Gammaanoo madh fudud, gaalib maw qaaday

Googeysi iigama baxee, geydh ma soo celiyey
Daruunbaa gawaan raaciyee, gololo maw yeelay
Geddii Faarax Nuuriyo Salaan, Garashadii Qawdhan
Gammuutiyo sidii Ina Ugaas ma u garraadeeyey.

Nimankii ka goor iyo ka goor, gurayey laaluushka
Gaalkii Caddaa maalmihii, uu geda-gedeynaayey
Giniyaadka nimankii wax badan, gacanta loo buuxshey

Kuwii geeshka wada ciidaniyo, gaadhka nagu meershey
Goonida kuwii noo jaray, ee edegga noo goostay
Sidii geel dhukaan qaba kuwii, godey dhafoorkayga

Gaajada kuwii noogu xidhay, guriga coonkiisa
Sidii ganato nimankii wax badan, gorofta noo yeelay
Isagoo gabraar ah buu ka yimi, garaca shaydaane

Nimankii Galbeedkaa shishiyo, Yurub ka soo gaasay
Nimankii innoo soo gudbee, layska garan waayey
Goonbiyadda nimankii sitiyo, gudinta xiiraysa

Nimankii gol-daaqa iga dhigay, amase gaadiidka
Sidii Awro geeddiya kuwii, gibilka ii saaray
Garyaqaannadeennii kuwii, geliyey meel oodan

Gashi layga qaatiyo kuwaan, godob ka yaabaynin
Garba-duub kuwii noo xidhee, weliba sii giijey
Nimankii gumeysiga, anaan geyin i yeelsiiyey.

Nimankii gardaafada badnaa, Guulle naga saarye
Gallad Eebbe weeyee ragbaa, noo gadaal kacaye
Waxa noo guntadey wiilashii, ganay libaaxiiye

Gungumii ka dhoof reerahay, gawda ku hayeene
Inkastoy gidaar adag dhigeen, gooye shicibkiiye
Waxba arartu yay ila gadmine waxan ku soo gooyey.

Galbataye xornimadii markaan, gurayey raadkeeda
Guuraha habeenkii kolkaan, gama' diidaayey
Gudguduudka waabberi markaan, Galawga dhiilleeyey

Gucla orodka raacdada kolkii, la isku soo gaadhay
Sidii geesi hiir qaba kolkaan, gamasyaduu qaatay
Guntigaan maroorsaday dhexdaan, gaw iskaga siiyey

Dar uunbaa is gaashaariyee, gololadaan muujey
Ruuxaan gunaanadey naftaan, go'itinkuu daayey
Gildhigaanka iyo saanaddaan, uga gabboon waayey

Gobannimo ku dirir baan ahaa, geeri ka hortoow'e
Xiddigtaa shan-geesta ah intaan, gaasha kaga yeelay
Calankaan gig tiray kii kalaan, gaday bidhaantiisa

Gabladiyo cayaartaan is rogey, gaalibkiyo heesta
Goolkaan wal-qalay sooryadaan, gacalka deeqsiiyey
Gofnerkiyo Kornayllada markii, gogosha loo duubay

Mid kastoo garoomo leh markaan, galab-carrawsiiyey
Gurigaan ka saaroba markaan, geliyey Soomaali
Nimankaan guddoonshaha ka dhigay, ima gargaaraane

Iminkaan guhaatan isu dilay, gocashadoodiiye
Baarlamanka guurraynayoow, laydin garan waaye
Goortaad ganuunkii dhanteen, gama'de shaaleeye

Nin waliba garoonbuu dhistuu, gaadhi iibsadaye
Gal kastoo dad-liqa maalinbaad, goror ka weydaaye
Go'a lacagta lagu qaadayaa, waydin soo gabiye.

Idinkaan geyaankii hablaha, gabadh ka waayaynin
Waxad Rooma uga guursateen, waa garaad xumo'e
Gaajaa dadkiinii qabaa, labada geesood'e
Waakaa gidaarada fadhiya, goloslahoodiiye

Ganbo kuma qadeeyaan markaad, Gini shidaysaane
Galabtaan dhegeystaba warkaad, geliso radio-ga
Iyo webiga soo guuxayeen, cidina gaadhaynin
Ma gurguurashaa wax u waddaan gaabiyaa camalku.